POSNANIA

POSNANIA

urbs Poloniae inferioris comitatus cognominis caput, ad Wartam fluv. cum arce elegante, estque inter colles. 8. leuc. Polonic. a Gnesna in Occasum, Francofurtum ad Oderam versus, 20. millar. Germanic. ab Uratislavia in Boream, uti 50. a Cracovia. Probe culta in planitie, Episcopalis sub Archiepiscopo gnesnensi. Hic Andreas Bninius Episcopus quinque Sacerdotes Bohemos publice cremavit, qui in Abrahami Zbancii ditione, huius iussu, Euangelium praedicaverant, circa A. C. 1438. Sed postea, nobilitas maioris Poloniae, sub finem saeculi XV. restitutionem calicis, hîc congregata, vehementer ursit: Matthias quoque Syonius, occulte mediâ nocte, magno cum profectu ibidem docuit, circa A. C. 1540. Exin Ecclesiae Posnamensi A. C. 1550. Pastor datus est a Bohemis Georgius Israel, Isbinciô Episcopô frustra obnitente; concessitque sacris aedes suas in suburbio Iac. Comes Ostrorogius, quô Maecenate Ecclesia usa est, usque ad A. C. 1568. Interfuit Synodo Ulodislaviensi Stanislaus Comes a Gorka Palatinus Posnaniensis, A. C. 1583. Sub Sigismundo dein Rege tum hîc, tum Vilnae, Euangelicis minae intentatae, unde commoti Proceres Thorunii Synodô A. C. 1595. celebratâ, Syncretismum inter Cofessiones Augustanam, Helveticam et Bohemicam renovârunt, gravaminaque libellô comprehensa ad Regem transmiserunt, qui illis satisfecit. Sed hôc ipsô irritatiores adversarii, furore studiosorum accensô, templum Euangelicorum exusserunt. quô postea reparatô, denuo privati illô sunt A. C. 1636. sicque Ecclesia Ostrorogana, quae prima in Maiore Polonia Euangelium susceperat, post annos 86. dissipata est. Laetus Compend. Hist. Univ.